Сейдаметова Айше

Дегерли  хатыралар

Кечмишини унуткъаннынъ – келеджеги де ёкътыр! 
Аиле дегерликлери ве ань-анелери мытлакъ несильден несильге кечмели.

Аиле дегерликлери – бу несиллер арасындаки рухий бир багъдыр. Меселя,бу багъны эски фоторесимлер альбомыны саифелегенде, ис этмек  мумкюн. Бизим энъ буюк дегерлигимиз -эски фоторесимлердир. Бу ресимлерде  аилемизнинъ  тарихи акс этильген.

Къартанамнен эски ресимлерни бакъаркен, андаки инсанлар ве вакъиалар санки козь огюнде джанлана ве бизлерге кечмишни анълаталар . Къартанам козь яшыны туталмай манъа бир ресимни косьтерди . «Бу ресимде рахметли бабам бар»- деди, ве онынъ аят икяесини манъа тариф этти.

ИСТОРИЯ ГАЗЕТЫ  г.СУДАКА1933-1941 «Бригадир»
Учреждена РК ВКП(б). Выходила на крымскотатарском языке. Первый редактор Али Тавшанджы. Заместитель Абдулла Оразлы. Работали Мосне Решитова, Ягъя Куртсеитов и Эсма Алиева. С 1937 начала выходить и на русском языке. В 1935-1937 гг. редактором был педагог, журналист, общественный деятель Али Асанович Асанов (1901-2.11.1938). Был расстрелян. Реабилитирован посмертно 12.12.1959г.

Ягья Куртсеитов   1892-1979

Ягья дедем 1892 сенеси Буюк маалле Таракъташ коюнде  дюньягъа келе. Дженктен эвель Судакъта чыкъкъан «Бригадир» газетасында чалыша. Къартанамнынъ анълаткъанына коре, о Кефеден  кягъыт кетире экен. 

Газет басма тезьясында бирер бирер арифлерни тизип, къолнен айландыра экен.

Басыладжакъ макъалелерни баш муаррир  Али Тавшанджы, ярдымджысы  Абдулла Оразлы,  Мосне Решитова,  ве  Эсма Алиеванен бераберлике  музакере этелер.

1935-1937 сенелери газетанынъ баш муарири -  оджа, маарифчи Али Асанов ола.Олар газетада эльбетте маариф ве тасиль акъкъында язгъандырлар деп зан этем.

Къартанамнынъ бабасы акъкъында  малюмат топламакъ макъсадынен, узун йыллар « Сувдагъ сеси» газетасында баш муаррирлиги япкъан Рустем Алиевнен корюштим. Рустем агъа манъа анасы Эсма Алиева дедемнен чалышкъаныны анълатты.

Эр бир аилеге аит олгъан дегерликлер ве урф-адетлер бардыр.

Бу дегерликлер  несильден несильге кечмели. Биз оларны козь бебеги киби къорумакъ керекмиз, чюнки бу – бизим хатырамыз, тарихимиз. Кечмишимизнинъ сырлары бу дегерликлерде сакълы. Кешке бу шейлер  джанланабильсе де, бизлерге  озь сырларыны ачса…

Къартанамнынъ бабасы Исмаил Гаспринскийнен айны вакъытта яшагъан ве фаалиет эткен. Эминим ки,  къартдедем де улу маарифчимиз, оджамыз И. Гаспринский башлагъан газетаджылыкъ ве маариф ишине аз да олса, озь иссесини къошкъандыр.

Мен бунен гъурурланам! 

Ресимдекилер:(солдан)

 Мосне Рашитова, Али Тавшанджи, 
Абдулла Оразлы,  Ягья Куртсеитов , Эсма Алиева.