Умерова Фатиме   Умерова Зоре

Бизим буюк битамыз

Меним буюк битам Абитова Назифе 1928с. Багъчасарайда догъды. Оларнынъ аилеси алты адамдан ибарет эди. Анасы – Абитова Сальге 1910с., бабасы Абитов Эдем 1905с., къардашлары: Абитов Сетья 1926с. , Абитов Сейтумер 1932с., Абитов Сеитвели1938с., Абитова Эдае 1940с.

18 майыста 1944с. гедже аскерлер къапуны къакътылар ве азырланмакъ ичюн 15 дакъкъа бердилер. Сонъ къырымтатарларны мезарлыкъта топлап, юк машинасына юкледилер ве станциягъа алып кеттилер. Бутюн аилени сюргюн эттилер. Тек Сетья къардашы дженкте олгъаны ичюн, сюргюн этильмеди.

Буюк битамны ве онынъ   аилесини юк вагонларына юклеп, бир ай девамында Озьбекистангъа Бекабад шеэрине кетирдилер. Анда оларгъа бир аран бердилер, ашамагъа шей ёкъ эди. Чокъусы адамлар ачлыкътан ве сыджакътан ольдилер.

1945с. Сетья къардашы дженктен къайтып, аилесини тапып оламай. Сонъ Озьбекистанда оларны тапа. Яшайыш пек къыйын эди. Буюклери маден заводына чалышып , кучюк къардашларыны бакъар эдилер. 1956с. къадар олар «пересенцы» деп сайыла эдилер ве джедвельде бельги къояр эдилер.

1951 с. Назифе битам акъайгъа чыкъты ве агъыр яшайышкъа бакъмадан, он бала догъурып, оларны осьтюрди. Эки кере «Ана къараман» мукяфатына наиль олды. Амма озю догъгъан Къырым Ватанына къайтып оламады. 

2001с.Ватанына кедер ве  асретлик  чекип, вефат  этти.

Меним   акъылыма  тюше  йыл  йылдан.
Унутмаз буны эр бир инсан.
Шу кунь кимнинъ омюрлик къалыр юректе
Нени  биталар, къартбабалар айталар бизге.
Бир сефер гедже саат он экилерде.
Бизим къапумызны  къакътылар.
Адамларгъа он беш дакъкъа  муддет  бердилер.
Догъмуш  коюмизден  чыкъардылар.
Сыра машыналар арекетте булунмакълар.
Ичинде толу отуралар татарлар.
 Чокъусы сагъ къалмадылар.
Чареси тапылмай ,окюрип  агълайлар.
Бир кунь Иншаллах ,
Эвге узакътан биз къайтармыз.
Бойле кучьлю агъры джанымдан кетмез.
Унутмадыкъ.Унутмайджакъмыз.
Унуттурмайджакъмыз.