Майыс 12-де Эски Къырым шеэриндеки миллий мектепте бу сене январь айында "Къырым даки миллий мектеплернинъ ана тили дерслеринде мультимедиа технологиялары вастасынен кьырымтатар халкъынынъ медении мирасыны сакълап къалув" лейхасы черчивесинде мектеп талебелери арасында илян этильген "Аиле дегерликлери" конкурсына екюн чекильди.
Конкурс
- яш несильге ватан-перверлик, миллий аньане, урф-адетлеримизге севги ве урьмет дуйгъупарыны ашламакъ;
- Къырымнынъ тарихы ве медениетине нисбетен меракъ уяндырмакъ;
- уста сыныф ве иджадий лабораториялар вастасынен теджрибе арттырмакъ;
- бала ве осьмюрлернинъ дизайнерлик иджатларына къолтутмакъ
- Къырымнынъ тарихы ве медениетине нисбетен меракъ уяндырмакъ;
- уста сыныф ве иджадий лабораториялар вастасынен теджрибе арттырмакъ;
- бала ве осьмюрлернинъ дизайнерлик иджатларына къолтутмакъ
макъсадынен отькерильди.
Озь эдждатларыны 10 несильге къадар бильген ве асырлыкъ аньанелери, урф-адетлерини сакълап кельген базы Авропа мемлекетлеринде шейлерге нисбетен мунасебет башкъаджадыр. Аукционларда сатлыкъкъа чыкъарылгъан я да адамларнынъ хусусий коллекцияларында сакълангъан дегерликлернинъ озь тарихы ве бу тарихны тасдикълагъан весикъасы ола. Аиле дегерликлери исе тек аиле гъуруры олмайып, бутюн мемлекетнинъ гъуруры ве байлыгьына чевириле. Шейлерге нисбетен бойле мунасебет - озь мемлекетининъ тарихы, медениетине нисбетен ватанперверликтир...
Я биз этрафымыздаки шейлер акъкъында нелер билемиз?
Рафтаки бакъыр джезве, эски асма къазан, диварда асылгъан Къуран ве иляхре эски шейлер чокъ вакъиаларнынъ шааты оларакъ, аиле, халкъ ве мемлекетнинъ тарихы акъкъында икяе эте билелер.
Конкурс тешкилятчыларынынъ макъсадларындан бири аиле дегерликлери акъкъында олдукъча зияде икяелер топлап, Интернетте виртуаль музей тешкиль этмек эди. Зарема Хайрединова ёлбашчылыгъындаки информацион меркез конкурскъа кельген ильмий-араштырув ишлерининъ джыйынтыгъыны чыкъарды ве Интернетте "Аиле дегерликлери" виртуаль музейини ачты. Оны артыкъ бутюн дюнья сейир этебиле.
"Аиле дегерликлери" конкурсында Кезлев, Къарасувбазар, Джанкой, Багъчасарай, Акъмесджит, Эски Къырым мектеплерининъ эписи олып 16 талебеси иштирак этти. Балаларны Эски Къырым миллий мектебининъ мудири Айше Чабанова, оджалар къаршылап алдылар.
Талебелер исе мусафирлерни концерт программасынен селямладылар.
Зарема ханым Хайрединова конкурс иштиракчилерини такъдим этерек, бирер-бирер оларгъа сёз берди. Башта, сёз буюклерге, дегенлери киби, Джанкой районындаки Завет Ленина кой мектебининъ 11 -нджи сыныф талебеси Шерьян Билялов чыкъышта булунды. О, миллий тербие ве миллий неширлер миллетнинъ темели олгьаныны аятий мисаллернен тасдикълады.
Акъмесджиттеки украин гимназиясынынъ талебеси Юнус Юнусов исе конкурснынъ энъ яш иштиракчиси. Секиз яшындаки Юнус эр кесни айретте къалдырды. Огъланчыкъ меракълы икяе азырламакътан гъайры, пек гузель йырлады ве, энъ муими, ана тилини мукеммель биле эм де сербест къонуша.
Эски Къырым миллий мектебининъ талебелерини айрыджа къайд этмели, оджалары Лира Джемадинова ёлбашчылыгъында алты бала азырлыкъ корип, пек меракълы чыкъышлар яптылар. Бу - Халиде Халилова, Ильяс Сейтаблаев, Усние Мустафаева, Алиме Тороз, Эльмаз Тохтарова, Абдураман Халилов.
Сонъ ардысыра Ленера Меметова, Эмилия Асанова, Мавиле Баталова, Эрнест Ипекчиев, Абдулла Эмиралиев, Эскендер Аметов, Ильмий Насуров озь ильмий - араштырув ишлеринен таныш эттилер. Балаларнынъ чокъусы озь чыкъышларыны мультимедиа ярдымынен яптылар.
Конкурснынъ нетиджелери боюнджа балаларнынъ эписи къыйметли бахшышларнен, "Аиле дегерликлери" джыйынтыгъы ве виртуаль музей дискинен такъдирлендилер.
Бундам да гъайры, конкурс иштиракчилерининъ ишлери "Балалар дюньясы" газетасынынъ саифелеринде невбетнен дердж олунаджакъ.
Эски Къырым мектебининъ мудири Айше Чабанова, Лира оджа Джемадинова, физика илимлерининъ намзети Ленара Алимова байрамгьа чевирильген бу аджайип конкурснынъ иштиракчилерини бугуньки гъалебенен хайырладылар, тешкипятчыпаргьа, тапебепернинъ ана-бабапарына, оджаларгъа исе тешеккюрлер бильдирдилер.
"Аиле дегерликлери" конкурсы пек чокъ адамлар ве тешкилятларнынъ эмеги саесинде отькерильди.
Тешкилий комитет бу тедбирнинъ тешеббюсчиси ве иштиракчилерине мукяфатлар берген АКъШ Тынчлыкъ Корпусынынъ хадими Анна Фрумес; Зарема Хайрединова ёлбашчыпыгъындаки "Козьайдын" информацион меркезине, маддий ярдымда булунгьан Эрнест Джеляловгьа ("ДЭФ" ширкети), Эски Къырым мектебининъ мудири Айше Чабанова, джыйынтыкъны нешир этювде ярдымда булунгьан оджалар Эльмаз Юнусова ве Ленара Кума, конкурс иштиракчилери ве оларнынъ оджалары эм де ана-бабаларына миннетдарлыкъ бильдире, илериде отькериледжек конкурсларда даа фааль иштирак этмелерини тилей.
Комментариев нет:
Отправить комментарий