Аметов Иззет
  Бизим тарихий музейимиз

Баба юрты-ешиль Къырым,

Сенсинъ бизим ана Ватан.

Бизлер сенден айрылмамыз,

Ич бир заман, ич бир заман.

                             Идрис Асанин

«…Ватан неден башлана?
Меним Ватаным – Къырым,
Меним Ватаным – эвим
Меним Ватаным – бу меним къорантам,къартбабам, къартанам…»
     
7 сыныф талебеси Аметов Иззет

          Меним дедем Аметов Ильвер къырымтатар яш несили ве озь торунлары ичюн, эдждатларымыздан къалгъан къыйметли эшьяларыны сакълап алды, къоруды.

Балалыкътан биз Ватанымыз, тувгъан топрагъымыз, эдждатларымыз акъкъында баба-деделеримиз айткъанларыны динълей эдик.
Бу меракълы икяелер манъа халкъымнынъ агъыр такъдирини анълаттылар, ана Ватаныма севги ашлаттылар.
Къырымтатар халкънынъ икяеси чешит  тарихий эшьялар иле багълы.
Музейимизнинъ тарихи бойле башлана…
Къырымтатар истидатлы  усталарнен япылгъан эски балчыкъ бардагъында аилемнинъ тарихи сакълангъан.

Аметов Ильвер дедемнинъ сёзлеринден: «Балалыкъта анам манъа бу бардакъкъа йогъурт къойып, онъа мукъайтлыкънен къулланмагъа айтты. Мен исе  бу  бардакънынъ къыймети неде? – деп, сорадым.

«Мукъайт ол, джойма, эвлядым!...»

Аметов Ильвер дедемнинъ сёзлеринден: «Халкъымыз ичюн энъ агъыр заманында, 1944 с. сюргюнлик башлагъанда, меним бабам бардакъ ичине алель-аджеле богъдай толдурмагъа етиштирди. Бу бардакъ Горький шеэрине, сонъра Узбекистан, Кубань тарафларына етип кельди. Бизим аилемизнен берабер агъыр вакъытларыны кечирди».
«Бу бардакъкъа мукъайт ол, эвлядым, оны  джойма, къорчала!
 О – аилемизнинъ дегерлиги!» - ялварды анам.

Халкъымызнынъ Ватанына къайтувы башлагъанда, бу бардакъ озь эвине, Судакъ шеэрининъ Ворон коюне, аилемнен берабер къайтып кельди.
Ильвер дедем анасына берген сёзюни тутты, бу бардакъны къорчалады.  Аилемизнинъ къыймети, эски, хорлангъан бардакъ дедемге музей ачмагъа ильхам берди.

Музейимиз 1992 сенеси Судакъ шеэрининъ Асрет коюнде ачылды ве  бугуньки куньгедже инкишаф этмеге девам эте.

Меним гъурурым!

      Бизлер, яш несиль, озь тарихимизни, медениетимизни сакъламакъ керекмиз! Эр аиленинъ озь тарихи, кечмиши, къыйметли ве дегерли эшьялары бар. Биз оларны бильмек, несильден-несильге теслим этмек  керекмиз.  Меним аилемнинъ тарихи де бар ве о бу эшьялар иле багълы.

Меним дедем – меним гъурурым! О къургъан музейини  мен къорчаламагъа деват этерим.