Нематуллаева Эмине
Достлукъ мектюплери

3 март куню Теберти кой мектебинде Гъафар Булгъанакълынынъ догъгъан кунюне багъышлангъан хатыра акъшамы олып кечти.

Эвеллери мектебимизде чалышкъан, тедбирлерде иштирак эткен фааль оджамыз - Сеитова Диляра Нафеевнаны давет эткен эдик. Онынъ хазинесинде Гъ. Булгъанакълы акъкъында чокъ малюмат бар экен. 50 йыл девамында Диляра бита бу мектюплерни урьметнен сакълагъан.

Эдебий акъшамда Гъафар Булгъанакълынынъ фоторесимлерини такъдим эткенде, Диляра бита пек эеджанлангъаны дуюла эди.

Сёзге чыкъкъанда, ресимлерден гъайры, махсус онъа багъышлангъан сатырлар окъуды. Бу ал мени пек меркъландырды. Оджамдан шаирнинъ иджады акъкъында китап сорадым, шиирлеринен таныш олдым ве Диляра аптеге мусафирликке бармагъа ниет эттим.

Сююрташ адлы къомшу койге ёл алдым. Бу койде яшагъан Диляра Нафеевна Сеитованы койлеримизнинъ сакинлери пек яхшы таныйлар. Халкъымыз Ватангъа авдет олгъан йыллары Диляра Нафеевна башлангъыч сыныфларда къырымтатар тили оджасы олып чалышкъан. Бу аджайип инсаннен чокътан танышым. Амма онынъ Гъафар Булгъанакълынен багъы — онынъ омюрининъ бойле сыры акъкъында ич эшитмеген эдим. Бу сырны озюм ичюн ачмагъа пек истедим.

«Гъафар агъамнен биринджи корюшювимиз меним дудумнынъ эвинде олып кечти»,- деди Диляра бита. «Мен о девирде (1966-1967) 1-инджи я 2-нджи курс студенти эдим. Дудум исе бизим корюшювимизге себепчи олды. Тувгъан агъасы — Гъафар (Эюпов) Булгъанакълы — иджаткяр инсан, публицист, шаир, мен исе( кулюмсиреп) -- яш студент, эдебий авескяр. Айтаджагъым, дудумларгъа мусафирликке баргъанымда, Гъафар агъам анда эди. Сыджакъ гонъюлли , гурь сачлы, кевдели бу инсан биринджи корюшювден акъылымда унутылмаз теэссуратлар къалдырды. Субетимиз пек меракълы кечкени себебинден, сагълыкълашкъанда: «Мектюбиме джевап язарсызмы?» -- суаль бердим. «Эльбет, къардашым , язарым» --деген эди Гъафар агъам.

1966 - 1967 сенелери узакъта къалгъан олса да, арамыздаки месафеге бакъмадан (мен — Ташкентте, Гъафар агъа исе Къазахистаннынъ Гурьев шеэринде), мектюплештик. Гъафар агъам озюни манъа пек якъын тута эди (базы мектюплеринде — къардашым, базыда исе — къызым, дей тургъан).

«Достлугъымыз эп къавийлешти, мектюплер ярдымынен олса да, сырларымызнен болюше эдик», – деди Диляра бита.

Шаирнен мектюплешюв чокъ йыллар девамында этти. «Агъыр хаста олып яткъанда - деп хатырлады Диляра Нафеевна - бу мектюпни манъа торунлары язып ёлладылар. Вефатындан сонъ исе огълу Марлен Эюпов ве къызы – Вилоранен биле языштыкъ,-деп, Диляра бита икяесини екюнледи.

Бу икяе меним ичюн дюньяда акъикъий достлукъ ве садыкълыкъ яшагъаныны ве яшайджагъынынъ исбаты олды.