Акиева Айше

Мукъаддес китап

Аилемизнинъ хазинесинде буюканамыздан къалгъан эски Къуран, дегирмен, джезве ве марама бардыр. Эльбетте, эр кесде ойле муджизевий мирас ёкътыр, онынъ ичюн биз бу шейлерни мукъайтлыкънен сакъламагъа тырышамыз. 

Мисаль ичюн, Къуран, тахминен, бир асырлыкъ тарихке маликтир. О несильден-несильге, анадан-къызына кече эди. Белли олгъаны киби, бу мукъаддес китап, адет узьре, той куню келинлерге бериле эди. Айше буюканамыз эки къыз-къардашындан энъ буюги олгъанындан себеп, айны онъа Решиде анасы бу Къуранны эманет этти. Решиде битамызгъа исе онынъ Азизе анасындан къалгъан эди.

Бу Къуран нидже тарихий адиселернинъ шааты олды. Энъ къыйын вакъытларда меним эдждатларыма ярдымджы олды. Атта сюргюнликтен кечип, кене де Къырымгъа къайтты. Акъикъатен, Къуран – мусульманлар ичюн битмез-тюкенмез къувет ве сабыр берген екяне китаптыр. Ве, менимдже, о дешетли майыс 18-инде Къуранны янына алгъан эр бир инсан чешит зорлукълардан иман ве умют иле кечти ве даима Юдже Раббимизнинъ сёзюнен яшап, ялынъыз Онъа ишанды. Шимди бу Къуранны къолума алып, оны даа нидже несиллерге еткизмеге умютинен яшайым. Рахметли Айше буюканам да айны бойле умютнен яшады.

Бедрие къартанам апаларынен

Решде буюканам, Дляра аламнынъ къорантасынен

Айше буюканам къорантасынен
ве Бедрие къартанам