Абдулмажитова Эмине

Коммунары коюмнинъ тарихы

Коммунары коюмнинъ тарихы

Къурман районында дюльбер бир Коммунары кою бар.

Бизим коюмиз Къырымнынъ ортасында ерлешкен. Онынъ этрафы челлюк, багълыкъ ве багъчалыкъ. Эвельден коюмизни узун бойлу тереклер яраштырды.

Коммунары коюнинъ тарихы бинъ секиз юз сексен докъузынджы сенеден башлай. Онынъ эски къырымтатар ады докъуз юз элли единджи сенесине къадар Анновка эди. Анновка коюни он докъузынджы асырнынъ ортасында немселер тешкиль эттилер. Онынъ ичюн о, немсе кою деп, сайыла. Шу вакъытта мында йигирми учь азбар ве юз йигирми секиз адам сайыла эди.

Тафсилятлы малюмат алмакъ ичюн, мен Екатерина Семеновнагъа мураджаат эттим. Онынъ айткъанына коре, дженк башлангъан сонъ, немселерни койден Сибирьге, Ставропольге, Казахстангъа сюргюн эттилер. Бинъ докъуз юз эллинджи сенелери Анновка коюне Смоленсктен, сонъра гъарп Украинадан кочюрильген адамлар кельдилер. Олар кой ходжалыгъынен огъраша эдилер. Анновкада башлангъыч мектеп бар эди, сыныфларда учь-дерт талебе окъуй эди.

Алтмышынджы сенелерде коюмиз инкишаф этмеге башлады, кенишледи. Шимди мында алты юз адам яшай.

Коммунары коюнде меним къорантам, сой-сопларым бар. Эвельде адамлар коюмизнинъ инкишафына буюк иссе къоштылар. Биз де оларнынъ ишини девам этмек, Коммунары коюмизнинъ даа гузель олмасына арекет этмек керекмиз.