Усеинова Эмине

Къуртумероджа Мамут

Мен къартбабамнынъ къартбабасы Къуртумер Мамутов акъкъында икяе этмек истейим.

Къуртумер оджа Мамут (Куртумер Мамут)-меним къартбабамнынъ бабасы 1913 сенеси Къырымда,Судакъ районынынъ Къоз коюнде догъды.Ерли мектепни аля битирди.Оджалар институнда ве Танковое окъув юртунда окъуды.

Таракъташ коюне кочип келе, мектепте джогърафия оджасы оларакъ чалыша,сонъра исе шу мектепнинъ мудири ола. 1934 сенеси шу мектепнинъ башлангъыч сыныф оджасы Эмине Ибраимованен къоранта къура. Къорантада дёрт эвляд осьтюрелер.

Амма дешетли дженк башлана…Къартбабамнынъ бабасы ордугъа чагъырыла. Судакъ шеэри мудафаасында иштирак этип, капитан унваныны къазана.

Ветанны къорчаламагъа кетти, тувгъан шеэрини ташлады, эшелоннынъ башлыгъы ола, офицер унваныны къазанды. Дженкнинъ сонъунадже дженклешти, Берлингедже барды. 8 февраль куню 1945 сенеси «Къызыл йылдыз» ордени берильди.

Ветанына 1947 сенеси къайта,амма сюргюнликке огърагъан къорантасыны Озбекистаннынъ Самаркъанд виляетининъ, Каттакурган шеэринде тапа.

Яшайыш насыл къыйын олмаса да, Ветангъа асретлик чекип, 1956 сенеси Къырымгъа къайтмагъа тырыштылар. Лякин тувгъан топрагъына къайтмагъа имкян олмагъаны себебинден, Мелитополь шеэрине кочип кельди. Чокъ къыйынлыкъларгъа бакъмадан, къартбабамнынъ бабасы элеваторгъа ишке кирди,анда бухгалтер олып чалышты.

Къырымгъа кочювининъ экинджи далгъасы 1968 сенеси башлана. Амма халкъымызгъа тек чёль тарафында яшамагъа изин берильгени себебинден, Судакъкъа къайтып оламай ве Ленин районынынъ, Красная горка коюнде ерлеше.

Тувгъан Судакъ шеэринде яшамагъа къартбабамнынъ бабасына къысмет олмады, амма биз, онынъ балалары ве торунлары,  Судакъ шеэринде яшаймыз ве Къуртумер  дедемизнинъ хатырасыны урьмет этип сакълаймыз, тувгъан шеэрине олгъан севгисини юреклеримизде ташымакътамыз…