Османова Айше Къартарамнынъ хатрасына

Османова Айше

Къартарамнынъ хатрасына

_____________________________________________________--

Къабиле тереги

Мен озь къорантамны пек севем ве эдждатларымнынъ терджимеиалынен меракъланам. Куньлернинъ биринде аилевий альбомымызны бакъкъанда, эски весикъа, фотосуретлер дикъкъатымны джельп эттилер. Бу - узакъ вакъыттан берли сакълангъаны себебинден сараргъан ве аилевий архивде сакълангъан весикъалар. Олар анамнынъ анасы, меним къартанам Абдурахманова Айше Тейфукъовнанынъ омюри ве педагогик фаалиети тарихыны тариф этелер.

Абдурахманова Айше Тейфукъовна 1927 сенеси январь 26-да Ялта шеэринде дюньягъа кельди. 

1942 сенеси Алманиягъа
зораки айдалды. Совет ордусы эсирлерни азат эткен сонъ Айше Орта Асия, Самаркъанд виляети Каттакъургъан шеэрине сюргюн этильди. 1948 сенеси акъайгъа чыкъты, секиз эвлят догъурды, осьтюрди, гузель тербие берди. 

1962 сенеси отуз беш яшында олгъанда тул къалды. 

1967 - 1973 сенелери Самаркъанд Девлет Университетинде тасиль алды, оджа
мутехассысы олды. 1992 сенеси ватаны Къырымгъа авдет олды. 2000 сенеси девамлы хасталыкътан сонъ фаний дюньяны терк этти.

Эски весикъаларны бакъкъанда, онынъ омюрининъ айры саифелери ачыла.

Абдурахманова Айше Тейфукъовнанынъ хатырлавлары
Йыллар кече, ве яш несиллер арасында дженк ве онынъ къараманлары акъкъында китапларны окъугъанлар эп эксиле, лякин о заманларны унутмамалы.

Насыл заман олса олсун, инсан ичюн энъ буюк дешет - бу дженк. Мен он учь, къыз къардашым исе он эки яшында экенде, биз Магдебурггъа зорбалыкънен ёнетильген эдик ве озь аджджы теджрибемизден нацист концлагерьлерининъ мушкюлликлерини бильдик. Андаки эсирлерден онынъ иле бугунь не оладжагъыны, келеджек куню яшайджагъы-яшамайджагъыны кимсе бильмей эди.

1967 сенеси Алишер Навои адына Самаркъанд Девлет Университетине окъумагъа кире, 1973 сенеси окъувы екюнлене, филолог мутехассысы, рус тили ве эдебияты оджасы ола.  Самаркъанд Девлет Университетини битирген сонъ Каттакъургъан шеэри Абдулла Муминов адына 4 санлы мектепте рус тили ве эдебияты оджасы олып чалыша.

________________________________________

презентацияны сейир этмек