Голова Эмине "Къартанамнынъ къушагъы"

Голова Эмине

Къартанамнынъ къушагъы

  

   Мен Фатма къартанамнынъ  йипишли къушагъы акъкъында  икяе этмек истейим.

     Фатма къартанам, бабамнынъ анасы, бир кунь манъа бу дюльбер къушакъны сандыгъындан чыкъарып косьтерди ве узакъ кечмиште олып кечкен вакъиаларны тариф этти.

      1929 сенеси Буюк Озенбаш коюнде Фатма къартанам  дюньягъа кельген. Онынъ бабасы Къасым огълу Эмир эфендининъ,  анасы Эмир къызы Эмине ханымнынъ  Фатма къартанамдан гъайры даа 3 эвляды бар эди:  Ибраим, Сейтумер, Асибе.

Буюк  Озенбаштан аиле Акъмесджитке 5 км якъынлыкъта олгъан, Кара Къыят коюне коче.
1939 сенеси Фатма къартанамнынъ  бабасы вефат эте. Сонъра къоранта Акъмесджитке бираз даа якъын, Къыят коюне ерлешелер.

Дешетли 1944  сенеси  олар Къыят  коюнден, севимли Къырымындан сюргюн этилелер.

 Фатма къартанамнынъ аилеси Ташкент виляетининъ Вахрушев совхозына тюшти. Джумле миллетимиз киби, олар да чокъ къыйналдылар.

Ачлыкъ, ёкъсузлукъ чектилер. Гедже - куньдюз тарлаларда, юзюм багъчаларында чалыштыла.

1950 сенеси Фатма къартанам Мустафа огълу Маммед дедемнен эвлендилер. Оларнынъ 4 огълу ве 3 къызы олды.

Къоджаман къоранта

Огъуллары: Ибраим, Мудессер, Энвер, Сервер. Къызлары: Сабрие, Зейнеп, Гульнара.

 Маммед дедем  догъма ускутлю эди.

Онынъ анасы Мумине къартана ишкузар, атик, тертип–низамны севген къадын экен.

Дейлер ки, немселер Ускут коюни басып алгъанда, Мумине къартананынъ эвине бир немсе субайы сюрип кирген. Мумине къартана да сипирткисини элине алып, немсени  чызманен эвин ичине кирмесин деп, къувалагъан. Субай  эвнинъ темизлигине шашып къалгъан.

Мумине къартаналарнынъ Ускуттеки эви. 1970 сенелери чекильген фото

  Бу йипишли къушакъ Мумине къартананынъ келинлик къушагъы эди. Оны Къырымдан кетирип, йыллар бою сакълады.

Маммед деде ве Фатма къартана

 

Маммед дедемнен Фатма къартананынъ тоюнда, келинине багъышлады.

Фатма къартана ве Маммед дедем муаббет яшадылар.  Омюр бою усанмадан чалышты, тырыштылыр, озь эвлятларына хышымлы тербие берип буюттилер.

  

Йыллар акъты, кечти. Ниает оларгъа да къайнана, къайната олмагъа сырасы кельди. Оларнынъ уйкен огълу Ибраим эвленгенде, Фатма къартана узакъ 1950 сенеси озюне багъышлангъан, къайнанасынынъ йипишли къушагъыны энди озь келинине такъты.

    Меним къоджаман аилем бар. Аиле мукъаддестир. Ватангъа,тильге , миллетинъе , джумле этрафкъа севги  аиледен башлай.

  Мен анам, бабам, агъаларым, къартана, деделеримни севем, урьмет этем.

Олар манъа магърур тилимизни, азиз Ватанымызнынъ ташы, топрагъы, сувуны, семасыны, бутюн дюньяны севмеге огреттилер. Аилеме миннетдарым. Аилемнен гъурурланам!

Къартанамдан мирас къалгъан бу йипишли къушакъ та, фотосуретлер де  аилемнинъ къыйметли дегерлиги, эдждатларымнынъ  парлакъ  хатиреси. Мен де шу ядикярлыкъларны къартаналарыма ошап, омюр бою сакълайджам!

Къартана ве къартбабаларымнынъ берген огютлерини омрюм бою юрегимде ташыйджам!

 

      АИЛЕ ДЕГЕРЛИКЛЕРИ-2021 ярышнынъ финалистлери