Муединова Анифе "Эдждатларымыздан бахшыш"

Муединова Анифе

Эдждатларымыздан бахшыш


Меним адым-Анифе . Мен 10 яшындайым ве Биюк –Онлар мектебининъ 4-джи сыныф талебеси олам. Бугунь мен «Аиле дегерликлери» не азырланаракъ , сизге эдждатларымыздан бизим къорантамызгъа кельген бахшыш акъкъында малюмат азырладым. Демек,башлайым.

Къырымнынъ аджайип кошесинде, Судакъ районында ерлешкен Айсерез коюнде, анамнынъ къартбабасы, Бекир дедемиз догъды.

Онынъ балалыкъ чагъы Къара денъизнинъ ялысында, дагълар арасында шенъ ве меракълы кечти.

Йыллар кечти. Халкъымызнынъ эр бир къорантасында олгъаны киби, Бекирнинъ къорантасына да къара, мушкюль куньлер кельди.

18 майыс – сюргюнлик куню.

Бекирнинъ о заман къомшу оларакъ якъын яшагъан Сервер эмджеси Зейнеп енгеанасынен берабер ашыкъып, абдырап сюргюнлик ёлуна азырлана эдилер. Джыйышылмагъа тек 20 дакъкъа берильген. 

Эр кес шашып шашмалагъан вакъытте, Зейнеп енгеанасы тез –тез чардакъкъа мине де, узун гугум ичинде олгъан бир авуч алтын капиклерни джебине къоя. Къайда кетемиз? Алымыз насыл оладжакъ? Бараджакъ еримизде яшайыш насыл оладжакъ? деген суаллер Зейнеп енгени раатсызлай, ве барем бу капиклер ярдым олур дие, капиклерни сыкъып джебине явлукъ ичине сакълай.

Сасыкъ, пис вагонлар Бекирнинъ къорантасыны ве сой – сопларны Узбекистаннынъ Бекабад шеэрине якъын ерлешкен Зафар коюне алып ташлай.

Янъы, ябанджы ерде янъыдан къурулып яшамагъа да енгиль дегиль эди. О заман Къырымдан гизли сакълап алынгъан алтын капиклер ачлыкътан ольмемек, аш – сув, урба алмагъа Зейнеп енгеанасынынъ къорантасына баягъы ярдым этелер.

Йыллар кече. Бекир дедемиз эвленеджек яшына кельгенде, Зейнеп енгеанасы онъа 5 алтын капиклерни бахшыш эте. Бекир дедемиз эвлене. Озь омюр аркъадашынен 5 эвлят корелер. Балалары оськен сонъ 1989 сенеси, бутюн халкъымыз умют эткени киби Ана-Ветангъа къайтып келелер. Мында Бекир дедемизнинъ 40 яшына кельген Ибраим огълусы вефат эте. Шимди онынъ дерт баласы бар. Бу –Фатиме, Мерьем, Гульнар ве Ахмет. Мерьем къызы иште, меним буюканам ола.

Бекир дедемиз 2 йыл эвельси, энгеанасы онъа тойгъа бахшыш эткен алтынларны чыкъарып, эр бир баласына бирер капик багъышлады. Бу алтын капиклер 1896 сенесинде чыкъкъанлар. Зейнеп енге анасына насыл келип чыкъкъанларыны кимсе бильмей. Сорап билинеджек адам да къалмады.

Алтын капиклернинъ корюнюши шимди бойледир.

Бекир дедемиз 3 ай эвельси 92 яшына келип кечинди.

Фатиме, Мерьем, Гульнар ве Ахмет бабаларындан ве онъа енгеанасындан бахшыш оларакъ кельген капиклерни хатыра оларакъ козь бебеги киби сакълайлар.

Бир кунь буюканам манъа бир капикни чыкъарып: «Къызым, балабан олсанъ, бу алтын капикни санъа багъышлайджам» - деп, ваде этти. Мен пек къувандым. Буюканам капиклер къайдан кельгенлерни манъа тариф этти. Мен буюк меракънен динъледим ве сизлерге де къыскъадан айтып бермеге ашыкътым. Менимдже, бу алтын капиклер, керчектен, эджатларымыздан келип чыкъкъан унутылмаз бахшыштыр!!!

       АИЛЕ ДЕГЕРЛИКЛЕРИ-2021 ярышнынъ финалистлери