Меджитова Асие "Сартана – меним юртум"

Меджитова Асие

Сартана – меним юртум

Кокни опер дагълары,
Берекетли дагълары.
Ем-ешиль орманлары –
Будыр меним Ветаным!

Сувлары салкъын, тыныкъ,

Дагълар толу къызылчыкъ,

Озю хазине-сандыкъ –

Будыр меним Ветаным!

 

Къырымнынъ къайсы бир кошесини алмайыкъ, эписи пек дюльбер, амма юрегиме энъ сыджакъ, нур сачкъан кой -  бу  догъгъан коюм. Онынъ  ады  - Сартана.

1989 сенеси сюргюнликтен сонъ меним къартбабам,  Меджитов Юнус (1931-2015), къорантасынен къайтып келип Сартанагъа ерлешти. Омюр аркъадашынен берабер 6 баланы котердилер ве 13 торун кордилер.

Мен - Меджитова  Асие. 13 торунны бири  олам. Къартбабам яшагъан койде дюньягъа кельдим ве  ана-бабамнен мында яшайым. Коюмизнинъ тарихи акъкъында башкъаларгъа да тариф этмеге истейим. Шу себептен  бу ярышта иштирак этмеге авес эттим.

Алексе́евка   (1948 йылгъаджек Сартана́) –  Къарасувбазар районында кой, Криничное кой шурасына менсюп.

Энъ муим Къырым дагъларнынъ шималий этегинде, дженюп районында, Сартана кою ерлеше.

Сартана, чокъусы дагъ койлери киби, къадим. Малюматкъа коре, койнынъ ады Sartana яни Sankti. Эвельде мында юнлар-румейлер яшагъанлар.

Кой дереде  Сартана озенининъ сагъ ялысында ерлеше (правый приток Танасу, Бассейн Биюк-Карасу)

Весикъалар боюнджа кой Къырым ханлыгъына эписи олып        9 йыл аит олды: 1777-1783 йыллары.

XIX асырнынъ сонъундан Сартананынъ укюмдары князь Кугушев эди. О къургъан юксек эки къатлы бина шимдики замангъадже тура.

 

Ватандаш дженк йылларында кой ве онынъ этрафлары партизан арекети меркезлериден  бири эди,  Мокроусов реберлигинде.

1948 йылда Сартана коюн Алексеевка адына деништирди-лер.

 

Азиз Къырым, ана юртум,
Меним тувгъан Ватаным!
Азиз Къырым, мен де сенинъ
Торунынъым, тамырынъ!

     АИЛЕ ДЕГЕРЛИКЛЕРИ-2021 ярышнынъ финалистлери