Меметова Эдие Къабурчакъ - меним дюльбер коюм

 

Меметова Эдие

Къабурчакъ - меним дюльбер коюм

 

Меним коюм Къабурчакъ

Багъ- багъчагъа комюльген

Бир тарафы Алан- къыр

Бир тарафында озен

Кучук- Къарасув экен

Меним коюм Къабурчакъ…

Къабурчакъ кою (шимди Мичуринское)  Къарасувбазар район меркезинден 13 км. узакълыкъта  ерлешкен. Койнинъ эалиси 860 инсан.

Меним ичюн бу энъ дюльбер кой, чюнки мында мен догъдым ве мында меним сой- акърабаларым яшай.

Бу койге 1989 сенеси меним къартбабам ве битам кочип кельдилер.

Бу койнинъ земаневий ады Мичуринское. Эски ады исе Къабурчакъ. Бурун- къаягъа бакъкъанда беяз нуммулит киречинден ибарет олгъаны корюне. Эвель заманларда мында къуруджылыкъ къабурчакъны къазып чыкъара экенлер.  Онынъ ичюн койнинъ адыны Къабурчакъ деп, къойгъанлар.

Бу кой пек балабан дегиль, мында 6 сокъакъ бар. Амма  койнинъ манзарасы пек дюльбер. Дагълар, Кучук- Къарасув озени, орманлар,юзюм ве алма багъчалары. Мында кельген инсанлар  бу дюльбер манзараны корип, ич бир вакъыт унутмайлар.

1832 сенеси чар укюметининъ къарары иле поволжье булгъарларыны  кочирдилер.Олар эсасен Къышлав  (шимди Курское), Къабурчакъ (шимди Мичуринское)  койлеринде ерлештилер.

Къабурчакъ кою ильк весикъаларда 1835 сенеси къайд этиле.

1892 сенисинде Къабурчакъ коюнде  359 инсан  ве 63 эв бар эди. 1897 сенеси – 543 инсан, 1902 сенеси- 623 инсан, 1915 сенеси- 570 инсан, 1926 сенеси- 830 инсан (эсасен булгъарлар) ве 198 эв бар эди.

Шимди де койде эски булгъар эвлери сакъланып къалынды.

Койнинъ четинде Кучук- Къарасув озени акъа. Башта бу озен кенъ ве терен  эди. Шимди исе кучук озен олып къалды.

1944 сенеси июнь 27-де къырым булгъарларыны Къырымдан Орта Асиягъа, Пермь къасабасына сюргюн эттилер.  Мында исе Руссие ве Украина тарафындан инсанларны алып кельдилер.

1986 сенесинден башлап мында къырымтатарлар кочип  башладылар. Мында олар  янъы эвлер, янъы омюр къурып башладылар. Шимди бу койде эсасен къырымтатарлары яшай.

Миллет	фаиз
къырымтатарлары	49,83
руслар	46,1
украинлер	3,26
башкъа миллет	0,12

 

Якъында койде дюльбер джами къурулды.

Эй, Ватаным , Ана- Юртум, догъгъан коюм, Къабурчакъ.

Сизсиз-меним бахт йылдызым, барлыгъым эм ёкълугъым.

Сизсиз – меним дюльбер йырым, севгим ве аятым.

Бу дюньяда энъ алевли куньдогъушым, куньбатым

Биз Къырымда яшаймыз. Меним рус достларым бар. Биз бераберликте окъуймыз, ойнаймыз. Дагъымызнынъ устюнде «Мир» сёзю язылгъан. Биз анълаймыз,  бераберликте, дост- муаббет яшамакъ керекмиз.

Биз Къырымда яшаймыз.

Алма, армут ашаймыз.

Фындыкъ, джевиз, мушмолла,

Ювез, бадем,эм айва.

Багъчамызда эр шей бар.

Кель, берабер ашайыкъ.

Дост- муаббет яшайыкъ.

   АИЛЕ ДЕГЕРЛИКЛЕРИ-2021 ярышнынъ финалистлери